Ubersitz

Isch natirli e Witz dä mit de vile Afrage. Mi Blog isch ja no niuw und d Wärbig drfyr i de Chinderschöh. D Ubersitz isch aber fyr mi sehr wichtig und drum schribeni gäre meh drzö.

 

Grundsätzlich isch das e Geischter-Vertribete. Mit em Trychlen und Trummle dir ds Haslital üs und i selle nämli de bese Geischter oder Dämone vertribe wärde. Der Ubersitz finded vum 30. ufe 31. Dezember statt ussser ds eint drvu sig e Sunntig. De wird ds Ganze vorverschobe. D Altjahrswuche fahd a de meischte Orte aber scho ds Mitternacht vum 25. Dezember a – da ertene de erschte Trychelkläng. Dr Ubersitz het siner Urspring irgdenwo ir vorchrischtliche Zyt, dennzumal no mid sälbergmachte miglichscht angschtiflessende Larve und Gloggi. Me isch denn drvo üsgange das speziell Gloggi die bese Geischter abhalte uberhöipt ds chu. Ganz eiget isch o dr Trychelmarsch vom Takt här. So eppis ghersch susch nenä. Und där Takt där gid Heenderhüt nu ab allem schribe.

 

I bi scho als chlins Meitli mit ga trychle. Zersch albe am Namittag zum ebä mit de andere Chind und später dö o am Ubersitz sälber. Bim erschte Mal weis i nu das i ha Angscht ghäbe uf ds Mal und umi hei bi. S hed üsgseh fyr mi als wellte si grad bis uf Meiringe löife vu Innertkirche üs. Da bini gläitig umi zu Möti und Ätti. Zum Glick isch de Angscht nid lang blibe und vo da a hani geng mitgmacht.

 

We me sälber trychled fahd dr Ubersitz de scho vorem 25. Dezember a – schlesslech will göd uberleid si was fyrnes Kostüm me aleid und was fyrne Larve. I bi nid eso dr Baschtler gsi aber drfyr ander um so meh. Scho nume deswäge isch o all Jahr interessant ds gugge. Sit es par Jahr te d Isebolger Trychler umi meh we freier; si gä mit Chrisescht, Fähli und holzige Larve uf d Gass. Das tücht mi irsinnig schen.

 

Als Frouw hani aber de Schwein läbeni chli ire niuwzytigere Generation – mis Grosi hed albe verzelld äs häig si als Ma messä verchläide bi de Haslibärger dass es häig mitderfe. Lang hei d Frouwi nid derfä trychle und wes mer rächt isch, isch no so im einte Zug. Bi mer aber nid sicher ob’s neuwä Wychel ischt.

 

Und ja etze gani halt meh als Zöschouer – bi scho lang furt zigled und ha mi nid drfyr eifach nume am Ubersitz ds chu ohni ds ebä vorhär. Tücht mi en Art nid richtig. Und weni welt chenä ebä de messti fasch de ganz Wuchä dobä si old emel en Abe ds mindscht meh. Aber ga gugge isch o schen und wärweise wär under de Larve isch und chli dorfe. Also, chüsch o??