Isch no spannend gsi…I bi are Predigt gsi (nid freiwillig gibes zue) wo das isch ds Thema gsi. Ds Thema isch natürli scho chli usfüehrlecher gsi u ha sit langem mal wieder emne Pfarrer gärn zueglost. Wenis richtig verstande ha isch er sogar Profässor und het süsch no mit Psychologie ds tüe.
Är meint uf jedefall dä Körperkult uf üsi üsseri Hülle bezoge sig nid guet. Jedefalls nid das wo übertribe und ghypt wird. Dr Körper sig «gottgegeben» und me söu Sorg ha drzue und ne pflege das isch wichtig. Ganz klar aber sig’s nid ds Einzig – meh bruch e xunde Körper um anderi Zil ds erreiche. Grad so wichtig we nid wichtiger sig aber di geischtigi oder seelischi Xundheit und Dankbarkeit. Fröid am Läbe, d Liebi, Fründschaft und so wyter….
I has mega spannend gfunde wi är das het ufzeigt und ob’s äch überhoupt guet sig wi vil mier Mönsche chöne igriffe und «repariere». Früecher heig me e Chrankheit agno und gluegt ds Beschte drus ds mache und xund ds wärde. Hüt aber vergässi me vor luter allem andere wie mit dr Chrankheit umdsga u het nume no Angscht und Druck.
I mues zuegä ds eint und ander isch mer chli «starch biblisch» dahärcho. Im Grund der Dinge hani aber ds Gfüehl i heig verstande was är meint und stimme däm voll und ganz zue. Äs brucht alls um würkli xund und glücklech chöne ds si. Äs wird o immer no underschätzt was die mentali Xundheit cha usmache. I lise drum gärn Büecher wi vom Tobias Beck oder etz grad vom Andreas Lanz und probiere ds reflektiere.
Weni nid wyter chume de hole mer o Hilf ; bi zum Bispil vo lescht bi öppem gsi wo «Chnörz» i de Ahnelinie cha lösche (also gaaaaanz churz zämegfasst). S isch idrücklech gsi was si het verzellzt und ds Ganze aluegt. Ha ds Gfüehl i sig dert «liechter» use und ha ds Mitarbeitergspräch vil liechter chöne nä als süsch. O bi anderem chani säge i rege mi weniger lang oder starch uf. Klar hurti tuets aber s si nume no Sekunde… Si het das no schön verzellt: I chön mer das vorstelle wie e platschvolle Chrueg – immer we öppis chöm de ghei er über. Nach dere Behandlig sig geng no Wasser drin aber viiiiiil weniger und äs louf de so nüm über. Cool oder? I würd mer wünsche dass meh Lüt über sich reflektiere, öppis probiere ds ändere und Hilf annähmti. I bi überzügt mier hätti alli vil meh Verständis für alls mügleche.
Hesch o scho so öppis erläbt oder wettsch wüsse woni bi gsi? I gibe dr gärn Uskunft u fröie mi uf di Kontakt.