U söu nech öppis säge? I weis es im Fall o nid… Aber i weis dass mi so (Vor-) Urteil je nach Situation ächt uf d Palme bringe. Chunt no drzue dass ig’s o nid vo allne glich mah lide.
Fakt isch für mi mier Froue tigge anders als d Manne u si anders als mier. U we mier Froue no d Mens hei oder churz drvor si de isches sicher nid immer eifach mit üs. A dere Stell es Lob a all die Manne wo das warnäh, s’es mängisch scho vor üs merke und üs we nötig umsorge u eifach verstöh. Härzleche Dank 😊
Aaaber itz chunts; o mier Froue verstöh nid warum das d Manne anders si. Warum äs zum Bispil so schwirig isch es Papierli grad i Ghüder ds tue, zulose wemer öppis verzelle oder ihri einzigi Multitaskingfähigkeit isch glichzytig ds bisle u ds dusche (Spöiler: das chöi mier übrigens ou).
U genau darum will mer alli verschide si und das o guet isch so hani de mängisch Müei we vorwiegend d Manne öppis abtüe oder erkläre mit em Satz; mier Froue sige kompliziert. Das findi scho fasch chli diskriminierend ehrlech gseit. Nume will d Manne üsi Gfüehl oder Emotione nid chöi nachvollzieh heissts nid dass ihri besser si, nume anders halt…. Drna tönts drum scho so als wärs e Nachteil so wi mier si.
Ha privat grad sone Situation wo für mi dr Idruck vorherrscht ds Problem wo ume isch sig nume wäg üs Froue vorhande. Will mer äbe kompliziert si. S isch drum gange, dass i öppis nid a di gross Glogge ghängt ha will mi het tüecht s bringt nüt. Es par einzelni wichtigi Lüt hei gwüsst worum äs geit u de andere hani nüt gseit will i weiss das es grad nid e anderi Lösig git u nüt änderet. Isch doch huere erwachse oder nid? 😉 Sider het sech’s chli gänderet und i ha due doch gseit um was es geit. Itz isch das aber schinbar ou nid guet. I hätt’s gschider früecher deponiert schins anstatt nüt ds säge u glich sig ds Problem wo besteit nume wäg üs Froue. Also chani grad mache was i wott; weni nüt säge isch nid guet u weni ds Mul uftue isches es Froueproblem. Cool oder?
Was machi also i Zuekunft u wi würdit ier drmit umga? I bi für jede Hiwis dankbar. 😊