Am Mittwuche hani gfrägt fyr freier hei vur Büde. Äs isch so schens Wätter gsi äs hed mi eifach zoge. Dahäime isch zwar minder schen gsi aber immerhin trochen. I ha mis Seckli und es Mässer packt
und bi abmarscherd.
Ig oder mer häi ds Glick vu isem Daheime üs gläitig es bitzli näbe üs ds si und o vum Wald si mer nid wyt. Zimli gli hani di erschte Pilze gfunde und vu denn a bini fascht chli imne Rüsch gsi ;-)
Kennsch das wet we imne Tunnel bisch und nume no eppis gsesch? Äbe i däm Fall Pilze, fasch we im Leed vum Peach Wäber "uberall hets Pilzli dra, Pilzli dra" - gäll etz singsch innerlich grad?
;-)
Pilzle und wäldele si grad zwäi Sache woni gärn mache. Mi tücht me chen sälte so göd abschalte und dr Chopf läre we im Wald. Das isch we e churzi Üszyt vum Alltag. Schmekä töts de o no göd und
isch so super fyr d'Atemwäge. Uuuuund wil i ender churzi Bäi ha isch es dö es Workout o no grad gsi. Uber Böimstämm i chlätere und dir ds Gstripp trampe het mi bis ds lescht finechli
brücht.
Umi daheime hets ghäisse Pilz rischte und versorge. Es par wenig hei mer nu brätled und grad zum z Nacht gno, dr Räschte isch ufe Dörrex chu. Us däne gits später es fäins Sesseli oder es Risotto.
Sammlisch sälber o Pilze? De säg mer doch was so nimmsch oder schick mer dis Leeblingsrezäpt, i freuwä mi drüf.
PS: i mim Cherbli glandet si de folgende Pilze - Schopftintling, Pfifferlinge, Lacktrichterling, Maröneler und Rotfüessler
